Bert Vergoossen

fse-017-031

Op 4 februari 2011 ’s avonds  laat bereikte ons het trieste bericht dat onze trainer, Bert Vergoossen, tijdens het hardlopen was overleden. Bert was een drijvende kracht binnen onze vereniging. Naast het trainerschap was Bert ook zeer actief binnen het team dat elk jaar de Annendaalloop organiseert. Ook deze website werd door hem beheerd en telkens verbeterd. Bert, een man met een groot verantwoordelijkheidsgevoel en een enorme betrokkenheid bij onze Lopersgroep, is na “zien lètste rundje” niet meer thuis gekomen.

 

In Memoriam Bert Vergoossen

Bert waas ozze trainer. Maar neet allein trainer, hae waas auch ein van de drievende krachte achter de Annendaallaup en hae beheerde de websites. Zien vakmansjap en zienne inzet veur de vereniging misse veer, maar noch vaol meer misse veer hem zelf . Ut is veur oos vereniging ein groot verlees. Maar Bert, veer gaon door en doe bös altied biej ôs!

Bert haolde in 1998 zien trainersdiploma en waerde in 2001 trainer van de klup es opvolger van Wilma Rusman. Bert waor vruntjelijk, vrolijk, zonger kapsones. Hae wool veural neemes tekort doon, zien eige belang kwaam op de letste plaats. Bert waas auch gedreeve, hae sjtreefde zien doele nao en bereikde die auch. Soms mit eine omwaeg, maar hae kwaam d’r. Biej de Annendaallaup deej Bert o.a. de veurinsjrievinge.

In ziene tied waas Bert eine gooje lauper, eine regionale topper, veural op de kortere aafstjenj. D’r zeen neet veul tiede van hem bekint. Bert zag altied: ich laup neet op tied, ich laup op plaats.

De traininge biej de Lopersgroep zin neet gemekkelik. Laupers zeen miense die ut allemaal waal weite en op de woonsdig zeen ut soms net kinjer op ein sjoolreisje. Maar Bert bedach sjteeds nuuj dinger en kreeg toch de aandag van os. Nuuj inzichte die hae op kursusse opdaej, pasde d’r onmiddelik toe op de training. Det leverde neet allein gooj training op, maar auch de neudige hilariteit. De letste tied haaj hae oefeninge mit coördinatie, korte peskes tösse heudjes en pionne door. Bert deej det veur en dan zoog ut gemekkelik oet. Maar es veer sjtief harke aan de beurt wore, waas ut ein anger verhaol. Aan ziene glimlach kosse zeen det hae tevreeje woor mit de oefening die d’r bedach haaj.

Wedsjtriede laupe en traine mit eine groep, dat vonj hae geweldig. Maar eine lauper löp auch väöl allein. De eenzaamheid van eine lauper. Esse allein op paad geis, is het soms knokke. Taege de windj enne raegen. Of taege dich zelf. En es ut lekker waer is, kiekse rondj en loesterse nao de geluide van de natuur of van de traktors op het landj. Nao ein minuut of 10 gaon dien gedachte mit dich oppe luip. Dan maakse planne veur later en vinjse oplossinge veur probleme. Doe geis veur dich oet kieke, nao de hemel kieke. Of d’r raegen of onwaer kump. Of det dao mesjien eemes mitkiek en op dich let.

Bert, es veer gaun laupe, dinke veer aan dich En es ze os zuus, löpse maar geweun mit

Uit het door Paul Lenaers voor Bert geschreven in Memoriam